వరుణ్ సందేశ్ తాజా సినిమాలో ప్లేబాయ్ గా అదరగొట్టాడట! ఆ సినిమా దర్శకుడు చెబుతున్న విషయం ఇది! ఫైట్లు, డాన్సులు ఇరగదీశాడు అని చెప్పుకోవచ్చునేమో కానీ..ఇలా ప్లేబాయ్ గా ఇరగదీశాడు అని చెప్పుకోవడంలో ఏదో ద్వంద్వార్థం ధ్వనిస్తోంది! ఈ సినిమా పేరు 'సరదాగా అమ్మయితో' ఈ సినిమా పోస్టులు కూడా వామ్మో అనిపిస్తున్నాయి. ఈ సినిమా నేపథ్యం గురించి దర్శకుడు వివరిస్తూ.. అమ్మాయిలందరికీ ఏదో ఒక వీక్ నెస్ ఉంటుందని, ఆ వీక్ నెస్ తో హీరో సరదాగా ఆడుకోవడమే ఈ సినిమా కాన్సెప్ట్ అని చెప్పాడు! మరి ఇలా వీక్ నెస్లతో ఆడుకోవడం, ప్లేబాయ్ పాత్ర అంటుంటే..ఇదేదో కచ్చితంగా బూతు సినిమా అయ్యుండొచ్చునని జనాలు భావిస్తున్నారు.
అసలే ఈ మధ్య కాలంలో నాలుగు బూతులు పెట్టి సినిమా వదలడం ఎక్కువవుతోంది! ఈ సినిమా గురించి అనుమానాలు రావడానికి మరో కారణం కూడా ఉంది! ఈ సినిమా దర్శకుడు గతంలో 'రాజు మహారాజు' అనే ఫ్యామిలీ డ్రామా ఒకటి తీశాడు. మోహన్ బాబు, శర్వానంద్ లు ముఖ్యపాత్రల్లో తీసిన ఈ సినిమా అంతగా ఆడలేదు, అయితే మంచి సినిమాగా పేరు తెచ్చుకుంది. తన గతం గురించి దర్శకుడు వివరిస్తూ.. తాను ఫ్యామిలీ సినిమా తీస్తే ఎవరూ చూడాలేదని, ఆ కసితో ఇప్పుడు సినిమా రూపొందించానని అన్నట్టుగా మాట్లాడాడు! దీంతో 'సరదాగా అమ్మాయితో' హడలుగొడుతుందేమో అని సినీ విశ్లేషకులు భావిస్తున్నారు!
