తిరుమల తిరుపతిలో రోజుకో అరిష్టం జరుగుతోంది. ఘాట్ రోడ్డులో యాక్సిడెంట్లు, తిరుమలలో కొండపై అగ్ని ప్రమాదాలు.. తాజాగా మంటపం దగ్గర కుంగిపోయిన నేల.. ఈ పరిణామాల నేపథ్యంలో అసలు ఏం జరుగుతోంది? ఇదంతా అరిష్టమా.. మానవ తప్పిదమా? అనే చర్చ ఇప్పుడు మొదలవుతోంది.
తాజాగా తిరుమలలో మరో అపశృతి చోటుచేసుకుంది. స్వామివారి కైంకర్యాలకు అనుగుణంగా టిటిడి నిర్మించిన మంటపం ఆవరణలో కొంతభాగం మూడడుగుల లోతువరకు భూమిలోకి కుంగిపోయింది. దాదాపు ముప్పై అడుగుల వెడల్పు...మూడడుగుల లోతువరకు భూమిలోకి కుంగిపోయింది. దీంతో భక్తులు ఈ ఘటనను మహా అపరాధంగా భావిస్తున్నారు. మరోవైపు తిరుమలలో ఇటీవల వరుసగా జరుగుతున్న ఘటనలపై కూడా భక్తులు ఆందోళన వ్యక్తం చేస్తున్నారు.
మరోవైపు తిరుమలలో వైభవోత్సవమంటపం కుంగిపోవటాన్ని భూగర్బ పరిశోధకులు తప్పుబడుతున్నారు. ఎక్కడైనా ఆలయాన్ని నిర్మించాలనుకుంటే కొంతమేర స్థలాన్ని వదిలిపెట్టి ఆలయాన్ని నిర్మించాలని చెబుతున్నారు. ఆలయ నిర్మాణం వాస్తు...భూపరీక్ష తదితర విషయాలను దృష్టిలో ఉంచుకోవాలన్నారు. భూమి పొరల్లో కదలిక సమతుల్యం పాటించకపోవటం వంటి కారణంతో కొన్ని ప్రాంతాలు కుంగిపోతాయన్నారు.
అయితే తిరుమల వైభవోత్సవ మంటపం వద్ద జరిగిన సంఘటనను మాత్రం భక్తులు జీర్జించుకోలేక పోతున్నారు. శ్రీవారికి జరిగే నిత్యకైంకర్యాలలో ఏవైనా తప్పులు దొర్లుతున్నాయా అనేఅనుమానాలు కలుగుతున్నాయని ఇక్కడి భక్తులు ఆవేదన వ్యక్తం చేస్తున్నారు. తిరుమలలో జరిగే వరుస సంఘటనలు భక్తులను భయపెడుతన్నాయి.
కారణం ఏదైనా వెంకన్న భక్తుల్లో నెలకొన్న అపనమ్మకాలకు టిటిడి చెక్ పెట్టాల్సిన అవసరం ఎంతైనా ఉంది. నూతన కట్టడాలను కట్టేటప్పుడు టిటిడి ఇంజినీరింగ్ శాఖవారు తగిన జాగ్రత్తలు తీసుకోవాలని భక్తులు సూచిస్తున్నారు.
