ఇప్పుడు ప్రత్యేక ఆంధ్ర రాష్ట్రం ఏర్పడితే కాంగ్రెస్ కు అధికారం అందుతుందా..అందదా అన్న సంగతి పక్కనపెడితే, ముఖ్యమంత్రి పదవికి పోటీ పడే అవకాశం కాపులకు లేదా బిసిలకు దక్కుతుంది. తెలుగుదేశం ఇప్పటికే బిసిలకు అగ్రస్థానం అని ప్రకటించింది కాబట్టి, కనీసం 70 స్థానలైనా బిసిలకు ఇవ్వాల్సి వుంటుంది. అంటే దగ్గర దగ్గర సగానికి కొంచెం తక్కువ. దానా దీనా చిన్నరాష్ట్రమైతే, తాము చక్రం తిప్ప వచ్చని కాపులు, బిసిలు భావిస్తున్నట్లు కనిపిస్తోంది. అందుకే అధిష్టానం మనసెరిగి ప్రవర్తిస్తున్నట్లు కలరింగ్ ఇస్తూ, చిరంజీవి, కిల్లి కృపారాణి, పల్లంరాజు తదితరులు రాజీనామా చేయలేదు.
ఇదిలా వుంటే, కెవిపి సారథ్యంలో జరిగిన మంతనాల్లో కూడా ఇదే అంశం చర్చకువచ్చినట్లు తెలిసింది. ఇప్పుడు సమైక్య రాష్ట్రాన్ని జారవిడుచుకుంటే, అధికారాన్ని కూడా జారవిడుచుకోక తప్పదని అందులో పాల్లోన్న అగ్రవర్ణాలు భావించినట్లు తెలిసింది. ఎలాగైనా ఉద్యమం ఉధృతం చేయాలని, తెలంగాణాను ఈ ఎన్నికల వరకైనా వాయిదా వేయించాలని నిర్ణయించినట్లు తెలుస్తోంది.మొత్తానికి ఇలా సమైక్య ఉద్యమం సం’కుల’సమరంగా మారడం అంటే, చివరకు నీరుగారడమే అవుతుంది.
